04. mars - 04. mars 2010  kl. 12-12.30

Hádegistónleikar - Ást og vonbrigði

Á þessum hádegistónleikum ætlar Ágúst Ólafsson baritón að koma fram ásamt Antoniu Hevesi píanóleikara sem hefur haldið utan um hádegistónleikana í sjö ár. Hann kemur heitur af fjölunum úr Íslensku Óperunni þar sem hann lauk nýverið að syngja hlutverk hershöfðingjans Belcore úr Ástardrykknum.


Ágúst Ólafsson stundaði nám við Tónlistarskóla Hafnarfjarðar hjá Eiði Á. Gunnarssyni og síðan við Sibelíusarakademíuna hjá Jorma Hynninen og Sauli Tiilikainen. Hann hefur sótt fjölda námskeiða, m.a. hjá Rudolf Jansen, Elly Ameling, Udo Reinemann, Wolfgang Holzmair, Hartmut Höll og Mitsuko Shirai. Ágúst sótti tvenn meistaranámskeið hjá Elísabetu Schwarzkopf og um tíma reglulega einkatíma hjá henni.

Helstu hlutverk eru Don Giovanni, Posa í Don Carlo og Le Disqorde í Les arts florissants í óperuuppfærslum Síbelíusar-akademíunnar og með Óperustúdíói Austurlands hlutverk greifans í Brúðkaupi Fígarós og Don Giovanni. Ágúst hefur sungið á ljóðasöngstónleikum víða í Finnlandi og í Þýskalandi, m.a. í Berlín á 100 ára ártíð Hugo Wolfs, sem Dietrich Fischer-Dieskau skipulagði og tók sjálfur þátt í. Hlutverk Ágústs hjá Íslensku óperunni til þessa eru titilhlutverkið í óperutryllinum Sweeney Todd hlutverk Skuggans í Rake´s Progress , Harlekin í Ariadne á Naxos og Douphol barón í La traviata, og auk þess að vera einn af söngvurunum í Óperuperlum. Ágúst er tilnefndur til  Íslensku tónlistarverðlaunanna sem verða veitt 13.mars í flokkinum Rödd ársins.  Ágúst var áður tilnefndur árið 2008 sem Flytjandi ársins innan klassíska tónlistargeirans.