01. júní - 21. júlí 2008  

Hafnfirðingar

Árni Gunnlaugsson hæstaréttarlögmaður fæddist 11. mars 1927 í Hafnarfirði.  Hann hefur verið ötull í að mynda Hafnfirðinga en það var fyrir 50 árum sem hann fór að hafa áhuga á að taka myndir af eldra fólki á förnum vegi í Hafnarfirði, aðallega af þeim Hafnfirðingum sem lengi höfðu átt þar heima.  Hvatinn að þessum ljósmyndum voru ljósmyndir eftir Gunnar Rúnar frá árunum 1940-50 en þær er að finna í tveimur bókum Magnúsar Jónssonar kennara. 
Á sýningunni eru um 440 ljósmyndir af eldri Hafnfirðingum, sem teknar voru á árunum 1960-92 og eru allar svart hvítar.  Af þeim 580 eldri borgurum sem koma við sögu á myndunum eru 35 á lífi í maí 2008.  Myndirnar eru úr safni 612 ljósmynda úr þremur bindum bókar Árna, ,,Fólkið í Firðinum”, en þar er að finna ýmsan fróðleik um fólkið og húsin, sem sjást á myndunum.  Haustið 1979 hélt Árni sýningu í Góðtemplarahúsinu á myndum úr fyrsta og öðru bindi nefndrar bókar.  Þá voru myndirnar úr síðasta bindinu til sýnis á Hrafnistu 12. apríl til 17. júní 2007.
Við hvert myndspjald eru upplýsingar um fæðingarár þeirra, sem á myndunum eru, hvaða ár myndin er tekin og dánarár þeirra, sem fallnir eru frá.
Sonur Árna, Árni Stefán, hefur annast alla myndagerð og veitt aðra aðstoð við undirbúning sýningarinnar.