Næstkomandi laugardag, 26. júní kl. 15, verður opnuð sýningin Formlegt aðhald verk Eiríks Smith frá 1951 – 1957 í Hafnarborg, menningar – og listamiðstöð Hafnarfjarðar. Listmálarinn Eiríkur Smith (f. 1925) á að baki langan og farsælan feril. Á síðari árum er hann einkum þekktur fyrir málverk þar sem maðurinn er gjarnan í forgrunni en landið og mannanna verk mynda magnþrungna umgjörð. En ferill Eiríks er langur og hefur tekið miklum breytingum bæði í takt við tíðarandann en einnig vegna þess að listamaðurinn hefur gert upp við sig að hann vilji hverfa frá ákveðinni myndgerð og kanna nýjar slóðir.

Á sýningunni Formlegt aðhald eru verk frá fyrstu árunum eftir að Eiríkur sneri heim frá námi í Kaupmannahöfn og París, síðari hluta árs 1951. Þá var mikill umbrotatími í íslenskri myndlist og var hann þátttakandi í þeirri formbyltingu sem var að eiga sér stað. Geómetríska abstraktlistin, strangflatarlistin, var að nema land og áberandi voru sterkir straumar sem einkum bárust frá París. Eiríkur hélt einkasýningu á slíkum verkum í Listamannaskálanum árið 1952 og haustið 1953 átti hann verk á tímamótasýningu á strangflatarverkum sem einnig var haldin í Listamannaskálanum. Haustsýningin vakti mikla athygli og lagði grunn að myndgerð sem átti miklu fylgi að fagna næsta áratuginn. Eiríkur sýndi á þessum árum verk sem báru með sér rökhugsun og góð tök á þeirri einföldun myndmálsins sem strangflatarhugsunin krafðist en hann sýndi einnig verk sem vitnuðu um næmi og ríka tilfinningu fyrir lit og skreytigildi slíkra verka.

Verkin á sýningunni eru flest unnin á árunum 1952 – 54 en það ár hóf Eiríkur nám í prentmyndasmíði og vann sem prentmyndasmiður samhliða myndlistinni. Það var síðan árið 1957 að hann gerði endanlega upp hug sinn gagnvart strangflatarlistinni og brenndi nokkurn hluta verkanna ásamt eldri verkum í malagryfju í Hafnarfirði. Það er því ekki mikið til af verkum frá þessum tíma en þau sem til eru bera því vitni að Eiríkur hafði góð tök á myndgerð strangflatarlistarinnar þó að hann kysi sjálfur að fara aðra leið.

Hafnarborg varðveitir fjölda verka eftir Eirík Smith en árið 1990 gaf hann safninu hátt á fjórða hundrað verk eftir sig, olíumálverk, vatnslitamyndir og teikningar. Í tilefni 100 ára afmælis Hafnarfjarðar árið 2008 var Eiríkur gerður að heiðurslistamanni bæjarins og af því tilefni vann Aðalsteinn Ingólfsson listfræðingur greiningu á verkum Eiríks í safneign Hafnarborgar. Nú í vetur bætti listamaðurinn málverkum frá árinu 1952 við gjöfina. Safninu er fengur í verkunum og eru þau mikilvægur hluti sýningarinnar. Einnig eru á sýningunni verk sem fengin hafa verið að láni frá Listasafni Íslands, Listasafni ASÍ og einkasöfnurum. Við undirbúning sýningarinnar nýttist vel heimildasafn sem Eiríkur færði Hafnarborg. Hluti þess er á sýningunni og má þar nefna ljósmyndir, greinar og sýningaskrár, meðal annars sýningarskrá sem Eiríkur hannaði fyrir Haustsýninguna 1953.

Sýningin nýtur stuðnings Safnasjóðs og Nýsköpunarsjóður námsmanna styður verkefnið. Sýningarstjóri er Ólöf K. Sigurðardóttir forstöðumaður Hafnarborgar, aðstoðarsýningarstjóri er Heiðar Kári Rannversson.

Sýningin Formlegt aðhald er fyrst í röð sýningar sem settar verða upp í Hafnarborg á næstu árum og kynna margbreyttan feril Eiríks Smith. Ferill hans greinist í tímabil sem eru innbyrðis ólík um leið og þau eru hvert um sig mikilvægt innlegg í íslenska listasögu. Hafnarborg varðveitir fjölda verka eftir listamanninn frá ýmsum tímum en hann er afkastamikill listamaður sem teljast má þjóðareign þar sem listaverk hans hafa víða farið. Flest helstu söfn landsins eiga verk eftir hann auk þess sem þau eru víða sýnileg í fyrirtækjum og inni á einkaheimilum. Eiríkur býr og starfar í Hafnarfirði.

Fólk við störf – Teikningar eftir Eirík Smith
Snemma á ævi Eiríks Smith var flestum sem til hans þekktu ljós að hér var á ferðinni afburða teiknari. Í Hafnarborg er varðveitt nokkuð af teikningum hans frá ýmsum tímum og eru þær mikilvægt innlegg í skoðun á þeirri þróun sem verður á myndhugsun listamannsins. Í Sverrissal á neðri hæð Hafnarborgar eru sýndar teikningar frá ýmsum tímum sem flestar eiga það sameiginlegt að sýna fólk við störf eða sem hluta af borgar- eða bæjarumhverfi. Teikningarnar bera það líka með sér að listamaðurinn er að rannsaka heimslistina og uppfæra á umhverfi sitt í Hafnarfirði.

Dagskrá:
Sunnudag 27. júní kl. 15 – Leiðsögn um sýninguna í umsjón Ólafar K. Sigurðardóttur sýningarstjóra og forstöðumanns Hafnarborgar og aðstoðarsýningarstjórans Heiðars Kára Rannverssonar

Sýningin stendur til 22. ágúst 2010. Í Hafnarborg er opið alla daga 12 – 17 nema þriðjudaga og á fimmtudögum 12 -21. www.hafnarborg.is s. 585 5790



Bókin The End – Venezia 2009 til sölu í Hafnarborg

Verk Ragnars Kjartanssonar, The End eða Endalokin, var framlag Íslands til Feneyjatvíæringsins 2009 og vakti gríðarlega athygli. Það samanstóð af myndbandsverki sem tekið var upp í Klettafjöllunum og hins vegar af gjörningi þar sem Ragnar málaði í hálft ár fyrirsætu sína í gamalli höll við Canal Grande í Feneyjum. Verkin voru sýnd í Hafnarborg í ársbyrjun 2010 og væntanleg er sýning á þeim í Luhring-Augustine galleríinu í New York.

Í tilefni af sýningunni í New York gefur Crymogea út bók með öllum verkunum frá Feneyjum, The End – Venezia 2009. Bókin er 206 blaðsíður, 17 x 21 cm að stærð og kilja prentuð á gæðapappír.

Bókin kemur út í takmörkuðu upplagi og aðeins 250 eintök eru til sölu. Bókin er til sölu í Hafnarborg og kostar 4.950 en einnig er hægt er að panta eintak með því að senda tölvupóst á crymogea@crymogea.is eða hringja í síma 5110910. Enginn sendingarkostnaður. Þetta er einstakt verk sem þegar hefur vakið mikla athygli hjá listunnendum í Bandaríkjunum.

Í Hafnarborg er opið alla daga 12 – 17 nema þriðjudaga og vakin er athygli á því að opið er á fimmtudögum 12 -21.

Fimmtudag 20. maí kl. 20 - Það er erfitt að vera listamaður í líkama rokkstjörnu – Erling T.V.Klingenberg 
Það er erfitt að vera listamaður í líkama rokkstjörnu er yfirskrift sýningar á verkum Erlings T.V. Klingenberg sem verður opnuð með gjörningi í Hafnarborg, menningar- og listamiðstöð Hafnarfjarðar, næstkomandi fimmtudagskvöld 20. maí kl. 20. Opnunin verður viðburður sem mun skilja eftir sig sjálfa sýninguna en hún verður að öðru leyti byggð á videóverki, skúlptúr og málverki svo fátt eitt sé nefnt.
Yfirskrift sýningarinnar vísar til umfjöllunarefnis sem Erling hefur talsvert fengist við en það er spurningin um það hvað það er að vera listamaður. Þetta verk eins og mörg fyrri verka hans hverfist um hans eigin persónu og mörkin sem eru eða eru ekki á milli einkalífs og opinbers lífs. Í gjörningnum beinir hann athyglinni að eigin persónu, líkama og tilvist og undirstrikar þessa þætti einnig í sýningunni með málverki og skúlptúr sem varpa fram spurningum um frummynd og eftirmynd, tilbúning og upprunaleika. Er Erling T.V. Klingenberg raunveruleg persóna?  

Þátttakendur í virkjun sýningarinnar eru The Stimulators en það eru þau Helgi Svavar Helgason, Valdimar Kolbeinn Sigurjónsson, Ómar Guðjónsson, Heiða Eiríks, Bóas Hallgrímsson og Óttarr Proppé auk þeirra taka þátt Kvennakór Öldutúns, Karl Jóhann Jónsson og Klingenberg Klúbburinn.

Erling T.V. Klingenberg (f.1970) hefur verið atkvæðamikill í íslensku listalífi á undanförnum árum en hann hefur um árabil rekið Kling og Bang sýningarýmið ásamt öðrum listamönnum. Erling lauk prófi í myndlist frá Myndlista- og Handíðaskóla Íslands árið 1994. Á meðan hann stundaði nám þar var hann skiptinemi við Fachhochschule fur Bildende Kunst í Kiel í Þýskalandi. Hann stundaði síðan framhaldsnám bæði í Þýskalandi og Kanada og lauk MFA gráðu við Nova Scotia College of Art & Design í Halifax. Erling hefur tekið þátt í fjölda sýninga bæði á Íslandi og erlendis.

Dagskrá:
Listamannsspjall. Fimmtudag 3. júní kl. 21 og sunnudag 20. júní kl. 15.

Sýningin stendur til 20. júní 2010. Í Hafnarborg er opið alla daga 12 – 17 nema þriðjudaga og á fimmtudögum 12 -21. www.hafnarborg.is s. 585 5790

Sunnudag 16. maí kl. 15 verður opnuð í Hafnarborg, menningar og listamiðstöð Hafnarfjarðar sýningin Staðir með verkum eftir þýska ljósmyndarann Friederike von Rauch. Hún hefur vakið athygli fyrir tærar og kyrrlátar ljósmyndir þar sem þekktir og óþekktir staðir eru sýndir í tærri birtu sem hún nær fram með nákvæmni og strangri nálgun við ljósmyndatæknina. Hún gerir tilraun til að afmá sögu og táknræna merkingu staðanna svo myndirnar verða draumkenndar og tímalausar. Á sýningunni eru meðal annars ljósmyndir sem hún tók á Íslandi þegar hún dvaldi á listamannasetrinu að Bæ í Skagafirði og birta þær skarpa sýn á umhverfið. Sýningin er hluti af Listahátíð í Reykjavik sem nú leggur áherslu á ljósmyndir í dagskrá sinni og nýtur stuðnings Goethe-Institut.

Friederike von Rauch (f. 1967) er menntaður iðnhönnuður og silfursmiður en sneri sér að ljósmyndun eftir að hafa unnið við val á tökustöðum fyrir kvikmyndir. Hún hefur haldið einkasýningar og verið valin á samsýningar meðal annars á yfirstandandi sýningu í Martin-Gropius-Bau í Berlín. Ljósmyndir von Rauch hafa verið gefnar út í bókum og nýlega hefur bók um Neues Museum í Berlín og arkitektinn David Chipperfield með ljósmyndum eftir hana hlotið viðurkenningar. Sýningin stendur til 20. júní 2010.

Dagskrá:
Fimmtudag 27. maí kl. 20 – Fyrirlestur
Friederike von Rauch segir frá verkum sínum og ferli sem ljósmyndara. Hún segir frá nálgun sinni við staði og þeirri tækni sem hún notar við ljósmyndavinnu sína.

Laugardag 29. maí kl. 14 – Örnámskeið
Stutt námskeið fyrir börn á grunnskólaaldri þar sem safnið verður rannsakað með það í huga að finna áhugaverða staði þar sem form og stemning skapa einstakan stað til að teikna. Ljósmyndir Friederike von Rauch verða skoðaðar og nálgun hennar við staði notuð sem innblástur. Örnámskeiðin eru ókeypis og öllum opin á meðan pláss leyfir.

Í barnastærðum - Sýningarlok og samtal við nemendur LHÍ
Næstkomandi sunnudag 9. maí lýkur sýningunni Í barnastærðum í Hafnarborg en hún var framlengd um viku þar sem aðsókn hefur verið með eindæmum góð og hafa þúsundir gesta sótt sýninguna. Sama dag kl. 15 munu nemendur í vöruhönnun við Listaháskóla Íslands taka þátt í leiðsögn og segja frá kassabílum sem þau hönnuðu sérstaklega fyrir sýninguna innblásna af hugmyndum frægra hönnuða. Kassabílunum hefur verið sérstaklega vel tekið en ungir sýningargestir hafa haft tækifæri til að prufa kassabílana með því að keyra um safnið. Á sýningunni er bæði íslensk og alþjóðleg hönnun sem gefur innsýn inn í heillandi heim hönnunar fyrir börn. Þá eru nokkur rými í safninu sérstaklega tileinkuð leikjum barna þar sem hægt er að dansa í þar til gerðum skóm, búa til hluti í opinni listsmiðju, fara í búninga og renna sér á rennibraut. Sýningarstjóri er Tinna Gunnarsdóttir hönnuður. Sýningin er unnin í samstarfi við Hönnunarsafn Íslands og nýtur stuðning Safnasjóðs, menntamálaráðuneytis, verslunarinnar Epals og Pennans.

Viðamikil dagskrá hefur verið í boði fyrir sýningargesti á öllum aldri s.s. sýningarstjóraspjall, samtal við hönnuði, fyrirlestur, leiðsagnir og skapandi listsmiðja fyrir börn og foreldra. Þá hefur einnig verið boðið upp á fræðslu fyrir skólahópa og hafa rúmlega tvöþúsund og þrjúhundruð nemendur á öllum skólastigum séð sýninguna og tekið þátt í leiðsögnum og listsmiðjum.

Sýningunni hefur verið framlengt til 9. maí 2010. Í Hafnarborg er opið alla daga 12 – 17 nema þriðjudaga og vakin er athygli á því að opið er á fimmtudögum 12 -21. www.hafnarborg.is s. 585 5790.

Lokahátíð Stóru upplestrarkeppninnar í Hafnarfirði fyrir þetta skólaár fór fram í Hafnarborg í gærkvöldi fyrir fullu húsi að viðstöddum forseta Íslands og menntamálaráðherra. 18 fulltrúar nemenda í 7. bekkjum í átta grunnskólum bæjarins og Álftanesskóla fluttu sitt mál í bundnu og óbundnu máli. Lesið var úr verkum Ármanns Kr. Einarssonar og ljóð Þorsteins frá Hamri auk upplesturs sérvalinna ljóða. Andrea Torfadóttir og Katrín H. Ólafsdóttir, tveir af sigurvegurum keppninnar í fyrra, kynntu skáld keppninnar í ár.

Fimm manna dómnefnd valdi síðan þrjá nemendur sem fengu sérstaka viðurkenningu fyrir flutning sinn. Það voru Hanna Lind Sigurjónsdóttir í Áslandsskóla (1. sæti), Ester Elísabet Gunnarsdóttir í Víðistaðaskóla (2. sæti) og Sverrir Bartolozzi í Álftanesskóla (3. sæti). Auk þeirra fluttu Miglet Fet og Paulina Pawlenzka ljóð á sínu móðurmáli og tveir hópar nemenda úr Tónlistarskóla Hafnarfjarðar fluttu tónlistaratriði.

Þá var veitt viðurkenning fyrir boðskort hátíðarinnar í ár og hlaut það Nadía Helga Loftsdóttir í 6. bekk í Setbergsskóla. Sömuleiðis voru veittar viðurkenningar fyrir þrjár bestu sögurnar í smásagnasamkeppni 8.-10. bekkinga í Hafnarfirði og hlutu þessar verðlaunin: 1. sæti: Birna Stefánsdóttir í Lækjarskóla (Klukkuna vantar tvær mínútur í tvö), 2. sæti: Anna Íris Pétursdóttir í Víðistaðaskóla (Glugginn) og 3. sæti: Elín Ósk Jóhannsdóttir í Víðistaðaskóla  (Eftirvænting).

Dómnefnd hátíðarinnar skipuðu þau Baldur Sigurðsson (formaður), Guðbjörg M. Sveinsdóttir, Heiðrún Kristjánsdóttir, Þorleifur Hauksson og Þórhallur Heimisson. Kynnir hátíðarinnar var Ingibjörg Einarsdóttir, skrifstofustjóri á Skólaskrifstofu Hafnarfjarðar, en hún hefur jafnfram yfirumsjón með keppninni í Hafnarfirði.

Sjá myndasyrpan af keppendunum 18 á heimasíðu Hafnarfjarðarbæjar hér

Starfsfólk Hafnarborgar óskar þeim Herði Lárussyni, Atla Hilmarssyni  og Vinnustofu Atla Hilmarssonar til hamingju með árangurinn.

Í vikunni voru veitt verðlaun fyrir bestu hönnun ársins 2010. Það er FÍT - Félag íslenskra teiknara sem veitir verðlaunin og er þetta í áttunda sinn sem þau eru veitt. Verðlaunin eru veitt hönnuðum fyrir framúrskarandi hönnun og vekur það athygli að verkefni unnin af Herði Lárussyni og Atla Hilmarssyni fyrir Hafnarborg, menningar- og listamiðstöð Hafnarfjarðar voru sigursæl og fengu þrenn verðlaun.

Besta veggspjaldið var veggspjaldið sem unnið var fyrir sýninguna Lífróður, heildarútlit Hafnarborgar fékk síðan tvenn verðlaun. Hönnuðirnir þykja hafa skapað spennandi og fjölbreytt útilit sem endurspeglar margbreytilega starfsemi en heldur í heildarútlit á sterkan og hagkvæman hátt.

http://www.atli.de/ 

Í barnastærðum er sýning sem opnar í Hafnarborg 13. mars kl. 15. Sýningin veitir innsýn í heillandi heim hönnunar fyrir börn. Sýningargestir á öllum aldri kynnast leikföngum og húsgögnum sem sérstaklega eru hönnuð fyrir börn og sækja innblástur í leiki þeirra og hugmyndaheim. Bæði verður sýnd íslensk og alþjóðleg hönnun en eitt af meginmarkmiðum sýningarinnar er að skoða verk íslenskra hönnuða. Mikill hluti þess sem unnið hefur verið hér á landi eru húsgögn og leikföng sem hönnuðir, arkitektar og listamenn hafa unnið fyrir sín eigin börn og fæst hefur komist í almenna framleiðslu. Eldri hluti sýningargripanna hefur ekki verið mikið sýndur opinberlega og er sýningin því einstakt tækifæri til að kynnast lítt þekktum verkum annars þekktra höfunda. Þeirra á meðal má nefna Gunnar Magnússon húsgagnahönnuð, Manfreð Vilhjálmsson arkitekt og myndlistarmanninn Dieter Roth. Verk yngri hönnuða hafa meira farið í almenna framleiðslu og eru nokkur dæmi um slík verk á sýningunni. Þar á meðal er hönnun frá Vík Prjónsdóttur, Róshildi Jónsdóttur og Sigríði Heimisdóttur. Einnig eru á sýningunni fjöldi hluta yngri hönnuða sem bera merki þeim krafti sem einkennt hefur íslenska hönnun á undanförum árum. Flestir erlendu hlutirnir eru eftir vel þekkta hönnuðir og hafa ýmist haft áhrif á íslenska hönnun eða sækja í svipaðar hugmyndir og setja þannig íslensku hlutina í alþjóðlegt samhengi. Á meðal þeirra alþjóðlegu hönnuða sem eiga hluti á sýningunni eru Charles & Ray Eames, Hella Jongerius og El Ultimo Grito.

Í tilefni sýningarinnar hafa þrír ungir hönnuðir unnið nýsköpunarverkefni og tekið að sér að hanna fyrir börn. Þau höfðu frjálsar hendur um það hvernig þau tókust á við verkefnið og er árangur vinnu þeirra á sýningunni auk þess sem sköpunarferlinu eru gerð skil. Hönnuðirnir eru þau Hanna Jónsdóttir, Haraldur Civelek og Ragnheiður Ösp Sigurðardóttir. Nýsköpunarverkefnin eru unnin í samstarfi við Hönnunarsjóðinn Áróru.  

Skemmtilegt innlegg í sýninguna er vinna nemenda í vöruhönnun við Listaháskóla Íslands en þau hönnuðu og smíðuðu kassabíla innblásna af hugmyndum frægra hönnuða. Kassabílarnir verða sýndir en ungir sýningargestir fá einnig að kanna notagildi þeirra og aka um í safninu. Þannig skiptist sýningin annarsvegar í hefðbundið sýningarrými þar sem hlutir eru sýndir og þeim gerð skil með textum og upplýsingum um höfunda og hinsvegar rými þar sem gestir á öllum aldri geta prófað sýningargripi og kannað þannig notagildi þeirra og hugmyndirnar að baki þeim. Einnig verður hluti safnsins lagður undir smiðju þar sem gestir geta notað innblástur sýningarinnar í eigin sköpun.

Sýningarstjóri er Tinna Gunnarsdóttir hönnuður. Sýningin er unnin í samstarfi við Hönnunarsafn Íslands sem leggur til marga sýningargripi og faglegan stuðning. Sýningin nýtur stuðning Safnasjóðs, menntamálaráðuneytis, verslunarinnar Epal og Pennans.

Viðamikil dagskrá verður í boði fyrir gesti safnsins á öllum aldri en einnig er boðið upp á fræðslu fyrir skólahópa sem bæði geta tekið þátt í leiðsögnum og listsmiðjum. Nánari upplýsingar fyrir kennara á heimasíðu safnsins www.hafnarborg.is. Boðið verður upp á leiðsögn um sýninguna auk þess sem sýningarstjóri og hönnuðir ræða um verk sín við gesti. Sýningin er hluti af Hönnunarmars 18. – 21. mars.

Dagskrá:

Sýningarstjóraspjall
Sunnudag 14. mars kl. 15
Tinna Gunnarsdóttir hönnuður og sýningarstjóri sýningarinnar annast leiðsögn.

Samtal við hönnuði á HönnunarMars
Laugardag 20. mars kl. 15
Hanna Jónsdóttir, Haraldur Civele og Ragnheiður Ösp kynna nýsköpunarverkefni sem unnin voru sérstaklega fyrir sýninguna.

Samtal við hönnuð
Sunnudag 18. apríl kl. 15
Harpa Þórsdóttir forstöðumann Hönnunarsafns Íslands ræðir við Gunnar Magnússon einn af afkastamestu húsgagnahönnuðum landsins um ferilinn og íslenska húsgagnahönnun á síðustu áratugum.

Örnámskeið
Sunnudagana 14. og 28. mars kl. 14
fimmtudag 22. apríl kl. 14 og
sunnudag 25. apríl kl. 14
Sköpunarsmiðja þar sem sýningin er notuð sem innblástur í hugleiðingar um hönnun og vinnu á verkstæði þar sem gestir fá tækifæri til að vinna útfrá hugmyndum sem birtast í sýningunni. Örnámskeið fyrir börn og fullorðna í fylgd með þeim. Þátttaka er ókeypis og öllum heimil á meðan húsrúm leyfir.  

Sýningin stendur til 2. maí 2010. Í Hafnarborg er opið alla daga 12 – 17 nema þriðjudaga og á fimmtudögum 12 -21. www.hafnarborg.is s. 585 5790

Endalokin – Ragnar Kjartansson frá Feneyjum til Íslands
Ljósbrot – Ingunn Fjóla Ingþórsdóttir
Laugardaginn 16. janúar kl. 15 verða opnaðar tvær sýningar í Hafnarborg, menningar- og listamiðstöð Hafnarfjarðar. Í meginsölum safnsins er verk Ragnars Kjartanssonar Endalokin, sem er afrakstur þátttöku Íslands í Feneyjatvíæringnum 2009. Í Sverrisal á fyrstu hæð safnsins er innsetningin Ljósbrot eftir Ingunni Fjólu Ingþórsdóttur.

Endalokin – Ragnar Kjartansson
Framlag Íslands til Feneyjatvíæringsins 2009
Endalok Ragnars Kjartanssonar er tvískipt sýning þar sem annarsvegar er sýnt tónlistar- og myndbandsverk og hins vegar innsetning sem byggð er á hálfsárs löngum gjörningi listamannsins í Feneyjum. Bæði verkin voru gerð sérstaklega fyrir íslenska skálann á Feneyjatvíæringnum, þar sem einstakt sýningarhúsnæði, borgin í allri sinni dýrð, tengslin við listasöguna og samhengið við hina stóru alþjóðlegu samtímalistasýningu réðu miklu um útkomuna.

Tónlistar- og myndbandsverkinu, Endalokin – Klettafjöll, er varpað á fimm tjöld samtímis. Á hverju þeirra leikur Ragnar á ólíkt hljóðfæri ásamt tónlistarmanninum Davíð Þór Jónssyni. Verkið var tekið upp um hávetur úti undir berum himni í ægifegurð hins kanadíska Banff þjóðgarðs. Umhverfi verksins er framandi og rímar vel við sveitatónlistina sem þeir Davíð sömdu. Þessi hluti sýningarinnar frá Feneyjum var ekki eins mikið ræddur í allri þeirri fjölmiðlaumræðu sem framlag Íslands olli en vakt þó mikla athygli í myndlistarheiminu og festi Museum of Modern Art listasafnið í New York kaup á verkinu.

Ólíkt myndbandsverkinu sem nú er sýnt í Hafnarborg alveg eins og það var á Ítalíu er hinn hluti sýningarinnar, Endalokin – Feneyjar, gjörbreyttur frá því sem var. Hér eru í raun til sýnis eftirstöðvar gjörningsins langa. Íslenski skálinn í Feneyjum var í óvenju myndrænum húsakynnum, lúnir múrsteinsveggir eru við að leysast upp í frumeindir vegna seltu og hýsa gamlan marmarabrunn, súlur og steinbekki sem setja sterkan svip á rýmið. Ragnar gerði lítið annað en mæta til starfa við opnun sýningarinnar ásamt myndlistarmanninum Páli Hauki Björnssyni sem stillti sér upp við brunninn á sundskýlu einni fata og hóf að mála fyrirsætuna. Málverk hrönnuðust upp og stöðugur straumur gesta lá í skálann, ferðamenn, listunnendur og borgarbúar sem vöndu þangað komur sínar. Í lok nóvember, eftir sex mánaða dvöl í Feneyjum, lauk tvíæringnum og íslenski skálinn var yfirfullur af málverkum. Eins og gefur að skilja er sú sýning sem nú getur að líta í Hafnarborg allt annars eðlis. Hér er engin villa frá fjórtándu öld, hvorki öldugjálfur frá sýkinu né merlandi birta á súlum og marmarabrunni. Umfram allt er ekki um lifandi vinnustofu listamanns að ræða. Hér eru hins vegar öll málverkin, yfir 150 að tölu, auk ljósmynda sem teknar voru reglulega og ýmissa muna sem mótuðu stemninguna á staðnum.
Ásamt málverkunum ætti þetta allt saman að gefa tilfinningu fyrir þeim tíma sem verkið fól í sér, bæði tímabilinu í heild sem og viðverunni dag frá degi. Það verður þó að ítreka að verkið sem slíkt, Endalokin – Feneyjar, heyrir sögunni til.

Endalokin eru sett upp í Hafnarborg í samstarfi við Kynningarmiðstöð íslenskrar myndlistar sem hefur umsjón með framlagi Íslands til Feneyjatvíæringsins. Framkvæmdastjóri verkefnisins var Christian Schoen, forstöðumaður Kynningarmiðstöðvarinnar og sýningarstjórar Markús Þór Andrésson og Dorothée Kirch . Fjöldi aðila stendur að baki verkefninu og ber þar að nefna mennta- og menningarmálaráðuneytið, utanríkisráðuneytið, gallerí I8, Banff Art Centre, Iceland Express, Inn Fjárfesting og Gallery Luhring Augustine New York.

Sunnudaginn 17. janúar kl. 15 munu sýningarstjórarnir Markús Þór Andrésson og Dorothée Kirch annast leiðsögn ásamt Ragnari Kjartanssyni um Endalokin.

Fimmtudaginn 21. janúar kl. 20 verður efnt til málþings um þátttöku Íslands í Feneyjartvíæringnum í samstarfi við Kynningarmiðstöð íslenskrar myndlistar.

Ljósbrot – Ingunn Fjóla Ingþórsdóttir
Ingunn Fjóla Ingþórsdóttir er ung listakona sem á að baki fáar en áhugaverðar sýningar. Hún hefur unnið stór málverk sem eru bundin ákveðnu rými og verk þar sem hún notar aðferðir málaralistarinnar á þrívíða hluti sem áhorfandinn gengur inn í. Sýning hennar í Hafnarborg ber yfirskriftina Ljósbrot og mætast í henni þættir sem Ingunn Fjóla hefur áður nýtt í verkum sínum, en það eru litaspil og formrænir fletir málverka, og rýmishugsun sem ögrar skynjun áhorfandans af umhverfinu.

Ljósbrot Ingunnar Fjólu er innsetning sem fyllir allan sýningarsalinn með marglitum strengjum sem minna á geisla úr óskilgreindum ljósgjafa. Strengirnir mynda eintóna litafleti sem fléttast saman og klofna eins og þegar ljós brotnar og klofnar. Verkið er einskonar völundarhús gagnsærra litaflata sem áhorfandinn hefur yfirsýn yfir um leið og litaspil þeirra blandast saman og úr verður heild. Hálf gegnsæir veggirnir mynda síbreytilegt litaspil í sjónrænni heild og leiða sýningargestinn í gegnum rýmið þannig að hann hverfur inn í nánast óefniskennt geislaflóðið.

Ingunn Fjóla lauk námi við Listaháskóla Íslands vorið 2007. Áður en Ingunn Fjóla hóf nám við Listaháskólann nam hún málaralist og lauk BA gráðu í listasögu við háskólann í Árósum. Hún hefur áður haldið tvær einkasýningar og tekið þátt í samsýningum bæði hér heima og erlendis auk þess sem hún hefur sinnt sýningarstjórn og er helmingur listdúósins Hugsteypunnar. Ingunn Fjóla býr og starfar í Hafnarfirði. Árið 2009 hlaut hún hvatningarstyrk Hafnarfjarðarbæjar til ungra listamanna.

Sunnudaginn 7. febrúar kl. 15 mun Ingunn Fjóla Ingþórsdóttir taka þátt í leiðsögn um sýninguna sína Ljósbrot.

Sýningarnar standa til sunnudagsins 28. febrúar. Hafnarborg er opin alla daga nema þriðjudaga frá 12-17 (athugið breyttur opnunartími) og á fimmtudögum frá 12-21.
www.hafnarborg.is

Dagskrá:
17. janúar kl. 15 – Leiðsögn um Endalokin með sýningarstjórunum Markúsi Þór Andréssyni, Dorothée Kirch og listamanninum Ragnari Kjartanssyni.
21. janúar kl. 20 – Málþing um þátttöku Íslands í Feneyjartvíæringnum í samstarfi við KÍM
7. febrúar kl. 15 – Listamannsspjall með Ingunni Fjólu Ingþórsdóttur
21. febrúar kl. 14 – Fjölskylduleiðsögn um sýningarnar

Lækkað verð í safnbúð yfir jólin
Hafnarborg selur bæði vönduð og falleg kort með listaverkum úr safneign og eftir aðra listamenn sem hafa sýnt hjá okkur. Einnig eru til sölu veggspjöld með listaverkum sem hafa verið sýnd í safninu auk þess sem við seljum bækur og sýningarbæklinga. Mikið úrval bóka er nú á lækkuðu verði sem er tilvalið fyrir jólagjafir.

Bækur um yfirstandandi sýningar
7. nóvember 2009 – 3. janúar 2010:
Úrvalið – Íslenskar ljósmyndir 1866-2009. Texti eftir sýningarstjórann Einar Fal Ingólfsson og myndir af verkunum.
Ofhlæði bókin um Davíð Örn Halldórsson en sýning hans Hvar er klukkan? er fyrsta einkasýning Davíðs í safni.
Bækurnar eru báðar á tilboðsverði yfir sýningartímabilið.
Meira um sýningarnarhér 

Kærleikskúlan 2009 – Snerting eftir Hrein Friðfinnsson
Nú um jólin gefur Styrktarfélag lamaðra og fatlaðra út Kærleikskúluna í sjöunda sinn. Tilgangur með sölu kúlunnar er að auðga líf fatlaðra barna og ungmenna, en ágóðinn rennur beint í starfssemi Reykjadals. Kærleikskúlan er til sölu í safnbúð Hafnarborgar. Í ár er það listamaðurinn Hreinn Friðfinnsson sem leggur félaginu lið en hann er einn af fremstu listamönnum þjóðarinnar. Kærleikskúlan hans heitir Snerting en verk Hreins eru mjög fágæt. Hreinn hefur hlotið fjölda viðurkenninga fyrir list sína, má þar nefna finnsku Ars Fennica-verðlaunin (2000), önnur verðlaun Carnegie Art Award (2000) og heiðursverðlaun Myndstefs (2007) fyrir einstakt framlag sitt til íslenskrar myndlistar.

Tvær sýningar verða opnaðar í Hafnarborg menningar – og listamiðstöð Hafnarfjarðar laugardaginn 7. nóvember kl. 15. Sýningin Úrvalið – Íslenskar ljósmyndir 1866-2009 og sýningin Hvar er klukkan? ný verk eftir Davíð Örn Halldórsson.

Hvar er klukkan? - Davíð Örn Halldórsson
Hvar er klukkan er yfirskrift sýningar á verkum eins af efnilegustu ungu myndlistarmönnum landsins, Davíðs Arnar Halldórssonar (f.1976). Hann hefur vakið athygli fyrir litrík málverk og myndheim þar sem blandað er saman formum og frásagnarkenndum veruleika. Málverkin vinnur hann á fundna hluti jafnt flata sem þrívíða; málar með skipalakki, spreyjar með úðabrúsalakki og teiknar með tússi á fundnar tréplötur, pappa eða beint á veggi, auk þess að nota litrík límbönd og efnisbúta. Á sýningum sínum hefur hann ekki takmarkað málverkin við myndflötinn heldur flæða verkin um sýningarsalinn og verða að rýmisverkum. Verk Davíðs vísa sterkt í graffítí og götulist um leið og þau eru hluti af málaralistinni.

Á þessari sýningu kveður við nýjan tón en auk þess að sýna málverk sýnir hann stórar ljósmyndir og vinnur á nýjan hátt með rými safnsins og umhverfi. Þó verkin beri höfundareinkenni Davíðs er hann hér að feta nýjar brautir. Ferill Davíðs hefur verið óvenju góður og hann verið áberandi í íslensku listalífi frá því hann lauk námi frá Listaháskóla Íslands árið 2002. Hann hefur haldið fjölda einkasýninga og átt verk á samsýningum í listasöfnum t.d. á hann verk á sýningunni Rím í Listasafni Reykjavíkur í Ásmundarsafni. Í verkum Davíðs má sjá ákveðna endurnýjun málverksins sem miðils ungra samtímalistamanna þar sem gætir áhrifa graffítílistar og frásagnarkenndra teikninga sem jafnvel má tengja við myndasögur.

Opnunardagur sýningarinnar er jafnframt útgáfudagur nýrrar bókar um listamanninn sem gefin er út af bókaútgáfunni Ókeibæ. Heiti bókarinnar er Ofhlæði og er hún bæði á íslensku og ensku. Í bókinni eru myndir af verkum og viðtal sem Markús Þór Andrésson tók við Davíð Örn auk texta eftir rithöfundinn Sjón. Ókeibæ er nýtt lítið bókaforlag sem sérhæfir sig í myndasögum, barnabókum og listaverkabókum.

Úrvalið – Íslenskar ljósmyndir 1866-2009

Í aðalsal Hafnarborgar verður opnuð vegleg sýning á ljósmyndum eftir úrval íslenskra ljósmyndarar. Sýningarstjóri er Einar Falur Ingólfsson og valdi hann ljósmyndir eftir þrettán íslenska ljósmyndara, sem öll gerðu ljósmyndun að ævistarfi. Ljósmyndararnir eru: Sigfús Eymundsson, Nicoline Waywadt, Magnús Ólafsson, Pétur Brynjólfsson, Sigríður Zoëga, Jón Kaldal, Ólafur Magnússon, Vigfús Sigurgeirsson, Ólafur K. Magnússon, Guðmundur Ingólfsson, Sigurgeir Sigurjónsson, Ragnar Axelsson og Páll Stefánsson.

Sýningin gefur einstaka sýn á sögu íslenskrar ljósmyndunar og varpar um leið ljósi á þróun ljósmundunar fram á okkar dag. Hér gefst tækifæri til að sjá einstök frumprent ljómynda úr eigu Þjóðminjasafns Íslands og ljósmyndir unnar með nýjustu tækni.

Sýningarstjórinn velur verkin bæði út frá fagurfræðilegum og sögulegum forsendum. Sýningin er þannig spegill á íslenskt samfélag og þá tíma sem ljósmyndararnir lifðu. Ljósmyndirnar eru mikilvæg heimild um mannlíf og sögu jafnframt því að bera vott um skapandi sýn ljósmyndaranna.

Ljósmyndirnar á sýningunni eru í eigu Ljósmyndasafns Íslands í Þjóðminjasafninu, Ljósmyndasafns Reykjavíkur, Morgunblaðsins og ljósmyndaranna. Sýningin var fyrst opnuð í Listasafninu á Akureyri í ágúst og er gerð í sérstöku samstarfi við bókaútgáfuna Sögur ehf. og Þjóðminjasafn Íslands. Bókaútgáfan Saga gefur út veglega bók með myndum og texta sýningarstjórans.

Dagskrá:
Sunnudagur 15. nóvember kl. 15 – Sýningarstjóraspjall Einar Falur Ingólfsson fjallar um verkin á sýningunni Úrvalið
Sunnudagur 22. nóvember kl. 15 – Listamannsspjall Davíð Örn Halldórsson tekur þátt í leiðsögn um sýninguna sína Hvar er klukkan?
Sunnudagur 29. nóvember kl. 14 – Fjölskylduleiðsögn og listsmiðja um sýninguna Hvar er klukkan? Verk eftir Davíð Örn Halldórsson

Nánar um sýningarnar á heimasíðu safnsins www.hafnarborg.is

Föstudaginn 28. ágúst kl. 20 verður opnuð ný sýning í Hafnarborg, menningar- og listamiðstöð Hafnarfjarðar. Á sýningunni, sem ber yfirskriftina Lífróður – Föðurland vort hálft er hafið, eru verk eftir tæplega þrjátíu listamenn sem endurspegla hafið á ýmsan hátt. Undanfarið ár hefur hafið leikið stærra hlutverk meðal þjóðarinnar en mörg fyrri ár og má eflaust leita skýringa í gjörbreyttum aðstæðum eftir hrun efnahagslífsins. Verkin á sýningunni birta mynd af hafinu sem náttúrufyrirbæri en túlka einnig mikilvægi þess fyrir sjálfsmynd þjóðarinnar og afkomu Íslendinga. Þannig eru á sýningunni verk sem fást við tengsl okkar við náttúruna og hugleiðingar listamannanna um félagsleg og pólitísk viðfangsefni sem tengjast hafinu. Mörg verkanna eru ný, sum hafa ekki áður verið sýnd hérlendis en flest eru þau frá síðustu tíu árum. Hér er á ferðinni áhugaverður hópur listamanna á ýmsum aldri og sýningarstjórar eru þau Dorothée Kirch og Markús Þór Andrésson. Sýningin nýtur stuðnings Hafnarfjarðarhafnar sem nú fagnar 100 ára afmæli sínu en auk þess standa Þjóðfræðistofa og Kvikmyndasafn Íslands að málþingi og kvikmyndasýningum sem tengjast efni sýningarinnar.

Kveikja sýningarinnar var sú sjálfsmynd sem birtist í orðræðu Íslendinga í kjölfar efnahagshrunsins síðastliðið haust þegar myndlíkingar sem tengdust hafinu urðu áberandi í orðræðu mann. Gripið er til myndlíkinga úr sjómannamáli þegar eitthvað bjátar á og aðstæður verða óvæntar og illskiljanlegar. Veruleikinn eins og hann var fyrir hrun var horfinn og orðræða efnahagslífsins sem menn litu á sem sjálfsagða átti ekki lengur við. Leitað var aftur til þess tíma þegar sjálfsmynd þjóðarinnar var nátengd hafinu. Í þessu felst viss ótti við að horfast í augu við raunveruleikann og um leið tilhneiging til þess að höfða til sameiningar þjóðarinnar, nota tungutak sem allir skilja og tengir okkur öll. Hvernig notum við hafið til að endurspegla okkar innri veruleika? Hvernig birtist okkur raunveruleiki hafsins nú á tímum?

Heiti sýningarinnar, Lífróður, vísar orðrétt til hafs og sjómennsku en nú á tímum er hugtakið fyrst og fremst notað í yfirfærðri merkingu í daglegu máli. Í því felst örvænting en líka von. Í þeirri orðræðu sem fylgdi afleiðingum bankahrunsins á liðnu hausti og kreppuástandinu sem síðan skapaðist hafa Íslendingar endurvakið gamalkunna sjálfsmynd um einangraða eyjarskeggja norður í hafi. Í eftirminnilegu októberávarpi til þjóðarinnar sagði forsætisráðherra m.a. í upphafsorðum sínum: „Stórir og stöndugir bankar beggja vegna Atlantshafsins hafa orðið kreppunni að bráð og ríkisstjórnir í mörgum löndum róa nú lífróður til að bjarga því sem bjargað verður heima fyrir.“ Undirtitillinn Föðurland vort hálft er hafið er sóttur í sálm Jóns Magnússonar (1896-1944) sem hefst með orðunum Líknargjafinn þjáðra þjóða... og biður náðar þjóð sem háir hetjulega baráttu í ólgusjó.

Áhugaverð dagskrá sem tengist efni sýningarinnar er unnin í samstarfi við Þjóðfræðistofu og Kvikmyndasafn Íslands. Sunnudaginn 30. ágúst kl. 15 annasta sýningarstjórarnir leiðsögn um sýninguna. Laugardaginn 5. september kl. 13 – 16 verður málþing skipulagt af Þjóðfræðistofu um hafið í orðræðu og sjálfsmynd Íslendinga. Þar munu fræði- og listamenn koma saman og ræða inntak sýningarinnar ásamt aðstandendum hennar. Á meðal þátttakenda eru Terry Gunnell þjóðfræðingur, Sigurjón Baldur Hafsteinsson mannfræðingur, Ingibjörg Þórisdóttir dramatúrg, Úlfhildur Dagsdóttir bókmenntafræðingur og Haraldur Jónsson myndlistarmaður. Stjórnandi verður Kristinn Schram þjóðfræðingur og forstöðumaður Þjóðfræðistofu. Kvikmyndasýningar Kvikmyndasafns Íslands eru í Bæjarbíói við Standgötu í Hafnarfirði. Sýndar verða bæði leiknar myndir og heimildarmyndir meðal annars Björgunarafrekið við Látrabjarg, Ingaló og Verstöðin Ísland.

Sýningarnar Kvikmyndasafnsins eru í Bæjarbíói, Strandgötu 6, Hafnarfirði. Miðaverð er kr. 500.- Sjá dagskrá hér

Eftirtaldir listamenn eiga verk á sýningunni:
Ásdís Sif Gunnarsdóttir, Ásmundur Ásmundsson, Birgir Andrésson, Elías Hjörleifsson og Ólafur Elíasson, Erla S. Haraldsdóttir, Finnur Arnar Arnarson, Gjörningaklúbburinn, Guðjón Ketilsson, Gylfi Ægisson, Helgi Þorgils Friðjónsson, Hrafnkell Sigurðsson, Hreinn Friðfinnsson, Hulda Hákon, Hlynur Hallsson, Ívar Valgarðsson, Kristinn E. Hrafnsson, Kristján Guðmundsson, Margrét H. Blöndal, Magnús Sigurðarson, Libia Castro & Ólafur Ólafsson, Ólafur Sveinn Gíslason, Ósk Vilhjálmsdóttir, Ragnar Kjartansson, Ragna Róbertsdóttir, Sigtryggur Bjarni Baldvinsson og Unnar Örn Auðarson.

Sýningarstjórarnir þau, Dorothée Kirch og Markús Þór Andrésson, hafa undanfarið varkið athygli fyrir áhugaverð verkefni, nú síðast á vegum Listahátíðar í fjórum vitum í fjórum landshornum og framlag Íslands til Feneyjatvíæringsins.

Sýningin Lífróður nýtur stuðnings Hafnarfjarðarhafnar sem nú fagnar 100 ára afmæli sínu og minnir um leið á sögu bæjarins sem útgerðarbæjar.

Nánar um sýninguna, listamennina og dagskránna á heimasíðu safnsins www.hafnarborg.is

Sýningin Safn(arar) framlengd til 16. ágúst
Vegna góðrar aðsóknar og mikils áhuga verður sýningin Safn(arar) sem nú stendur í Hafnarborg – Menningar- og listamiðstöð Hafnarfjarðar framlengd til 16. ágúst. Á sýningunni gefst einstakt tækifæri til að sjá glæsileg verk úr fórum einkasafnara og verk úr stofngjöf listaverkasafnaranna Sverris Magnússonar og Ingibjargar Sigurjónsdóttur til Hafnarborgar. Einkasafnararnir sem lánað hafa verk á sýninguna eru Gunnar Dungal og Þórdís Alda Sigurðardóttir, Bragi Guðlaugsson, Ingunn Wernersdóttir og Sverrir Kristinsson.

Á sýningunni eru perlur úr íslenskri listasögu allt frá upphafi 20. aldar og til samtímans eftir meira en fjörtíu listamenn sem allir eru á meðal fremstu listamanna þjóðarinnar. Verkin eru mjög fjölbreytt, allt frá málverkum til myndbandsverka og veita innsýn í áhuga og eldmóð safnara sem hver um sig hefur persónulega sýn og safna myndlist af miklu áhuga. Sýningin gefur mynd af ólíkum safneignum en beinir jafnframt sjónum að mikilvægu hlutverki listaverkasafnara í myndlistarheiminum.

Næstu tvo sunnudaga, 9. og 16. ágúst kl. 15, munu safnararnir taka þátt í leiðsögn um sýninguna.

Sýningin stendur til 16. ágúst og er opin alla daga nema þriðjudaga  11 – 17 og fimmtudaga 11 – 21. Nánari upplýsingar á www.hafnarborg.is og í síma 585 5790.

Maður lifandi í veitingastofu Hafnarborgar býður upp á frábæra heilsurétti, kaffi og kökur.

Á Jónsmessunni, miðvikudaginn 24 júní kl. 17 verður opnuð í Hafnarborg sýning á mörgum af perlum íslenskrar myndlistar. Sýningin ber yfirskriftina Safn(arar) en á henni gefur að líta verk úr safneign Hafnarborgar og verk sem fengin eru að láni hjá fjórum listaverkasöfnurum, þeim Gunnari Dungal og Þórdísi Öldu Sigurðardóttur, Braga Guðlaugssyni, Ingunni Wernersdóttur og Sverri Kristinssyni. Sýningin gefur mynd af ólíkum safneignum en beinir jafnframt sjónum að mikilvægu hlutverki listaverkasafnara í myndlistarheiminum.

Verkin sem sýnd verða úr safneign Hafnarborgar eru úr stofngjöf Sverris Magnússonar og Ingibjargar Sigurjónsdóttur en þau lögðu grunninn að Hafnarborg með því að færa Hafnarfjarðarkaupstað húsið og listaverkasafn sitt að gjöf. Sýningin er haldin í tilefni þess að 24. júní eru 100 ár liðin frá fæðingu Sverris. Safneign þeirra hjóna er fjölbreytt en mest ber á verkum frá miðri 20. öld. Til að bregða frekara ljósi á hlutverk safnara og til að skoða ólíka sýn þeirra á söfnun eru verkin sett í samhengi við samtímann með því að sýna jafnframt verk úr eigu samtímasafnara, fólks sem nú er í svipuðu hlutverki og þau hjónin voru á sínum tíma.

Einkasöfnin sem skyggnst er inn í eru fjölbreytt og spanna í raun íslenska listasögu frá upphafi 20. aldar þó hver safnari um sig hafi ólíkar áherslur. Verkin á sýningunni gefa aðeins örlitla innsýn í glæsileg söfn sem segja hluta íslenskar listasögu og bregða ljósi á þá ástríðu sem rekur eigendur þeirra áfram.

Á sýningunni eru verk eftir meira en fjörtíu íslenska listamenn og má meðal þeirra nefna frumherja íslenskrar myndlistar eins og Þórarinn B. Þorláksson, Ásgrím Jónsson og Kjarval og helstu frumkvöðla abstraktlistarinnar eins og Hörð Ágústsson, Guðmundu Andrésdóttur og Karl Kvaran. Einnig eru sýnd verk eftir fjölda starfandi listamanna og má þar meðal annarra nefna; Kristján Davíðsson, Hildi Bjarnadóttur, Birgi Andrésson, Gjörningaklúbbinn, Katrínu Sigurðardóttur og Egil Sæbjörnsson.

Tækifærið verður notað til að velta upp spurningum um einkasöfn og safnara. Hvað er það sem rekur þá áfram og í hverju er gildi slíkra safna fólgið? Safnararnir sem lána verk á sýninguna taka þátt í pallborðsumræðum sem fara fram kl. 16 á opnunardaginn og eru öllum opnar.

Sýningarstjóri er Ólöf K. Sigurðardóttir forstöðumaður Hafnarborgar og hún mun annast leiðsögn um sýninguna sunnudaginn 28. júní kl. 15.

Dagskrá:
Samtal við safnara - Miðvikudag 24. júní kl. 16
Opnun - Miðvikudag 24. júní kl. 17
Sýningarstjóraspjall – Sunnudag 28. júní kl. 15

Sýningin stendur til 3. ágúst.
Frekari upplýsingar á www.hafnarborg.is
Sími 585 5790

Laugardaginn 16. maí kl. 15 - Tvær sýningar opnaðar í Hafnarborg
Jónína Guðnadóttir – Vættir
Guðný Guðmundsdóttir - Madame Lemonique & Madame Lemonborough

Laugardaginn 16. maí kl. 15 verða opnaðar tvær sýningar á verkum íslenskra myndlistarkvenna í Hafnarborg. Hér eru á ferðinni sýningar þar sem teflt er saman tveim kynslóðum listamanna sem hvor um sig er mótuð af sterkum tíðaranda og aðstæðum sem hafa áhrif á feril þeirra og sköpun.

Á annarri hæð safnsins verður sýning á verkum Jónínu Guðnadóttur (f. 1943). Á sýningunni, sem ber yfirskriftina Vættir, sækir Jónína í brunn íslenskrar þjóðtrúar um leið og hún veltir fyrir sér íslenskum samtíma og því hvort landvættirnar hafi yfirgefið þjóðina. Ferill Jónínu hófst upp úr miðjum sjöunda áratugnum en þá hafði hún lagt stund á myndlistarnám við Myndlista- og handíðaskóla Íslands og við Konstfack í Stokkhólmi. Grunnur Jónínu er í leirlist og hún hefur um árabil verið í framvarðarsveit íslenskrar leirlistar um leið og hún var öflugur brautryðjandi þess að rjúfa tengslin við nytjalist og nota leirinn sem efnivið sjálfstæðra listaverka. Frá því hún hélt sína fyrstu einkasýningu í Unuhúsi árið 1968 hafa verk hennar verið sýnd víða í virtum sýningarsölum og söfnum bæði hér heima og erlendis. Jónína hefur ætíð vakið athygli fyrir þá gríðarmiklu vinnu og hugsun sem hún leggur í verk sín. Þau einkennast af afar vel mótuðum og framsæknum stíl í úrvinnslu og framsetningu viðfangsefnanna.

Sýning Guðnýjar Guðmundsdóttur (f. 1970) ber yfirskriftina Madame Lemonique & Madame Lemonborough. Á sýningunni verða skúlptúrar og mjög stórar teikningar þar sem teflt er saman formum og ljóðrænu myndefni sem helst á sér samsvörun í myndlýsingum eða jafnvel myndskreytingum Skólaljóðanna. Vinna hennar með rými teikningarinnar og útfærsla á formum og arkitektúr í þrívíðum skúlptúrum er þungamiðja sýningarinnar. Guðný stundaði myndlistarnám við Listaháskóla Íslands en hélt síðan til Hamborgar þar sem hún stundaði framhaldsnám. Hún býr og starfar í Berlín eins og margir listamenn sem eru þátttakendur í hinni alþjóðlegu hringiðu myndlistar samtímans. Guðný er virk í sýningahaldi erlendis en hefur aðeins haldið eina einkasýningu á Íslandi. Verk hennar vöktu þá athygli fyrir fágæta næmni og nýstárlega úrvinnslu hefðbundinna miðla.

Í verkum þessara tveggja kvenna mætir jarðbundinn og efnislegur heimur leirs og lands, huglægum og fíngerðum heimi þar sem form og frásögn eru fléttuð saman í sterka heild. Sýningarnar tvær eru samtal tveggja kynslóða sem mótaðar eru af ólíkum aðstæðum. Báðar hefja þær feril sinn hér á landi og sækja sér framhaldsmenntun utanlands. Þær spretta þannig úr svipuðum jarðvegi en eru mótaðar af ólíku viðhorfi tveggja tíma þar sem landið jafnt sem alheimsþorpið eru áhrifavaldar.

Listamennirnir taka þátt í leiðsögnum um sýningarnar: Guðný Guðmundsdóttir sunnudaginn 24. maí kl. 15, Jónína Guðnadóttir mánudaginn 1. júní (annar í hvítasunnu) kl. 15.

Sýningunni lýkur 21. júní og er opin alla daga nema þriðjudaga frá kl. 11-17 og fimmtudaga kl. 11-21. Aðgangur er ókeypis.

Veðurskrift: Guðrún Kristjánsdóttir
Laugardaginn 4. apríl kl. 15 verður opnuð sýning á verkum Guðrúnar Kristjánsdóttur í Hafnarborg, menningar– og listamiðstöð Hafnarfjarðar. Sýningin ber yfirskriftina Veðurskrift.

Guðrún er þekkt fyrir áhrifamikli verk sem túlka íslenska náttúru og náttursýn á frumlegan hátt. Á sýningunni í Hafnarborg verða innsetningar, málverk og ljósmyndir sem fást við síbreytileg form og kvika náttúru landsins. Sýningin Veðurskrift skiptist í þrjá kafla Veðurlag, Veðursögur og Veðurskrifstofur.

Lestur á landinu í ólíkum veðrum eru grunnstef í sýningunni þar sem síbreytileiki íslenskrar náttúru er notaður til hugleiðingar um tíma og tilvist mannsins í náttúrunni. Meginhluti sýningarinnar er innsetningin Veðurlag, og fyllir aðalsal Hafnarborgar. Þar notar listamaðurinn ljós, hljóð og vörpun til að kalla fram upplifun af kvikri náttúru. Hluti innsetningarinnar er hljóðmynd unnin í samstarfi við Hróðmar I. Sigurbjörnsson en þar er leitað í brunn íslenskrar menningararfleiðar og byggir hljóðmyndin á íslenskum vísum sem Guðrún hefur valið. Annar hluti sýningarinnar ber yfirskriftina Veðurskrifstofur. Þar er m.a. skoðað hvernig veðurfarið teiknar nýja og nýja mynd í fjallshlíðar og það borið saman við endurskriftir íslenskra handrita. Ljósmyndahluti sýningarinnar kallast svo Veðursögur en þar segir hver mynd sína sögu af landi og veðri, tíð og tíma. Í sýningunni verða veðrið og landið að verkfærum sem listamaðurinn notar til að túlka síbreytileika og nálægð manns og lands.

Guðrún Kristjánsdóttir (f. 1950) er á meðal þeirra listamanna sem leitað hafa markvisst í brunn íslenskrar náttúru og hafa verk hennar vakið athygli frá því hún kvað sér fyrst hljóðs á níunda áratugnum. Hún hefur haldið fjölda einkasýninga og tekið þátt í samsýningum bæði hér heima og víða erlendis.

Efnt verður til leiðsagna um sýninguna. Sunnudaginn 19. apríl kl. 15 tekur Guðrún þátt í leiðsögninni, sunnudaginn 26. apríl kl. 14 verður fjölskylduleiðsögn og sunnudaginn 3. maí verður efnt til Veðurstofuspjalls þar sem listamaðurinn ræðir við Oddnýju Eir Ævarsdóttur, heimspeking. Sýningarstjóri er Birta Guðjónsdóttir.

Sýningunni lýkur 10. maí og er opin alla daga nema þriðjudaga frá kl. 11-17 og fimmtudaga kl. 11-21. Aðgangur er ókeypis.

Frekari upplýsingar um sýninguna og listamanninn má finna á heimasíðu Hafnarborgar www.hafnarborg.is

Opnun á nýrri sýningu á verkum eftir Helga Gíslason myndhöggvara í Hafnarborg laugardag 21. febrúar kl. 15
VERUND er yfirskrift sýningar á nýjum verkum eftir Helga Gíslasonar myndhöggvara sem opnuð verður í Hafnarborg, menningar– og listamiðstöð Hafnarfjarðar laugardaginn 21. febrúar kl.15.

Á þessari umfangsmiklu sýningu eru nýjar lágmyndir, teikningar og skúlptúrar þar sem mannslíkaminn er meginviðfangsefnið eins og í fyrri verkum listamannsins. Helgi er á meðal þekktustu myndhöggvara þjóðarinnar og þekkja margir skúlptúra hans og stærri verk sem sett hafa verið upp opinberlega víða um land til dæmis á Höfn í Hornafirði, Hallargarðinum í Reykjavík og á Húsavík auk lágmyndar í Fossvogskapellu.

Þema sýningarinnar er rannsókn á manninum og mælikvörðum hans þar sem listamaðurinn teflir saman mannslíkamanum og verkfærum sem notuð eru til að mæla heiminn og kortleggja. Helgi greinir viðfangsefnið niður í meginlínur þar sem sterk form svipta manninn persónueiginleikum en leitast við að afhjúpa sameiginlegan kjarna. Á sýningunni er mikil áhersla á blý sem efnivið en auk lágmynda þar sem listamaðurinn notar blýið getur að líta fjölda teikninga sem endurspegla hugmyndavinnu listamannsins og þátt teikningarinnar í sköpunarferlinu.

Helgi lauk námi frá Myndlista-og handíðaskóli Íslands árið 1970 og hélt til frekara náms í Svíþjóð við Valand listaháskólann og útskrifaðist þaðan árið 1976. Hann hefur hefur haldið fjölda sýninga, hlotið viðurkenningar og unnið samkeppnir um opinber listaverk. Árið 1991 hlaut hann Bjartsýnisverðlaun Bröstes.

Sunnudaginn 15. mars kl. 15 tekur listamaðurinn þátt í leiðsögn um sýninguna. Hluti sýningarýmisins hefur verið lagður undir verkstæði eða vinnustofu þar sem gestir geta kynnst eiginleikum blýs og teiknað. Sunnudaginn 1. mars kl. 14 – 16 verður síðan listsmiðja fyrir börn og forelda þar sem sýningin verður notuð sem uppspretta í teikningu.

Sýningunni lýkur 29. mars og er opin alla daga frá kl. 11-17 og fimmtudaga kl. 11-21, lokað á þriðjudögum. Aðgangur ókeypis.

Sunnudag 15. febrúar lýkur sýningunum Íslenskir listamenn ljósmyndir eftir Jónatan Grétarsson og Þættir verk eftir Björgu Þorsteinsdóttur
Um næstkomandi helgi lýkur í Hafnarborg sýningunum Íslenskir listamenn og Þættir. Á sýningunni Íslenskir listamenn eru ljósmyndir eftir ungan ljósmyndara Jónatan Grétarsson. Hann hefur tekist á hendur það verkefni að ljósmynda íslenska listamenn og eru rúmlega 40 portrett af þekktum listamönnum á þessari sýningu. Sýningin hefur vakið athygli fyrir sterkar myndir sem birta áhugaverða sýn á skapandi einstaklinga samtímans. Á sýningu Bjargar Þorsteinsdóttur Þættir eru málverk, teikningar, þrívíð verk og verk unnin með austurlenskri Shibori tækni. Verkin bera vitni um tilraunamennsku sem byggir á agaðri tækni þar sem efnum og aðferðum er teflt saman á nýstárlegan hátt.

Hafnarborg er opin alla daga nema þriðjudaga 11-17, fimmtudaga 11-21. Ókeypis aðgangur.
Nánari upplýsingar á www.hafnarborg.is

Munið að Maður lifandi er í Hafnarborg!

Fréttabréf Hafnarborgar Febrúar 2009:
5. febrúar kl. 12 Hádegistónleikar Dökku hliðar baritónsins
Að þessu sinni er breski söngvarinn Alex Ashworth, baritón, gestur Antoniu Hevesi píanóleikara. Hann hóf söngferil sinn í kór Tewkesbury Abbey. Þaðan fór hann til St John’s College í Cambridge bæði í kórskóla og bóklegt nám. Þá hlaut hann styrk til náms í Royal Academy of Music. Alex vann til allmargra verðlauna meðan á námi stóð. Hann hefur sungið með Íslensku óperunni þar sem hann hefur farið með stór hlutverk.
Hádegistónleikar eru fyrsta fimmtudag í mánuði yfir vetrartímann og hafa verið frá árinu 2003. Antonia Hevesi bæði skipuleggur og stjórnar þeim en hún er píanisti Íslensku Óperunnar. Ókeypis aðgangur meðan húsrúm leyfir.

7. – 13. febrúar Myrkir Músíkdagar í Hafnarborg
Myrkir Músíkdagar eru árlegur viðburður Tónskáldafélags Íslands. Í ár verða fjölbreyttir tónleikar í Hafnarborg og víðar. Á meðal flytjenda í Hafnarborg eru Tinna Þorsteinsdóttir ásamt Frank Arnink, Rannveig Fríða Bragadóttir, hljómsveitin Stelkur, Emil Friðfinnsson og Þórarinn Stefánsson auk Sigurðar Flosasonar og hljómsveitar sem spila síðasta kvöldið, föstudaginn 13. febrúar. Sjá nánar á vefsíðu safnsins www.hafnarborg.is og www.listir.is/myrkir miðaverð er 1500 kr á alla tónleika nema hádegistónleikana 10. febrúar er 1000 kr.

8. febrúar kl. 15 Listamannsspjall
Leiðsögn um sýninguna Þættir með listakonunni Björgu Þorsteinsdóttur.
Á sýningunni eru málverk og teikningar þar sem listakonan teflir saman efnum og tækni á nýstárlegan hátt. Ókeypis aðgangur.

21. febrúar – 29. mars VERUND verk eftir Helga Gíslason
Verund – hlutlægur veruleiki er yfirskrift sýningar Helga Gíslasonar. Hann er einn af þekktustu myndhöggvurum þjóðarinnar og eru höggmyndir hans víða um land. Á þessari umfangsmiklu sýningu verða teikningar, lágmyndir og skúlptúrar. Þema sýningarinnar er rannsókn á manninum og mælikvörðum hans og endurspeglar sýningin þátt teikningarinnar í sköpunarferli listamannsins.

Tríó Reykjavíkur, Hafnarborg, 11. janúar 2009 kl. 20

Nýárstónleikar með Sigrúnu Hjálmtýsdóttur og Bergþóri Pálssyni.
Tríó Reykjavíkur heldur sína árlegu nýárstónleika í Hafnarborg, menningar og listamiðstöð Hafnarfjarðar, nk.sunnudag þar verður svo sannarlega slegið á léttari strengi með þeim Sigrúnu Hjálmtýsdóttur og Bergþóri Pálssyni. Fimmmenningarnir munu að venju koma víða við og leiða tónleikagesti inn í hrífandi og fjölbreyttan heim tónlistar, sem alls staðar hefur notið framúrskarandi vinsælda.

Flutt verða lög úr söngleikjum eftir George Gershwin, Frank Loesser, Irving Berlin, ragtime tónlist eftir Scott Joplin, Havanaise og Svanurinn eftir C. Saint-Saëns, aríur úr Marziu greifafrú og Sardasfurstynjunni eftir Emmerich Kálmán að ógleymdum Sardas eftir Monti. Einnig verða lög eftir Paganini, Offenbach og Johann Strauss.

Umfram allt eru þetta tónleikar framúrskarandi flytjenda sem koma öllum í létt og gott skap í upphafi nýs árs.

Meðlimir Tríós Reykjavíkur eru þau Peter Máté píanóleikari, Guðný Guðmundsdóttir fiðluleikari og Gunnar Kvaran sellóleikari.

Miðasala í Hafnarborg kl.11-17, miðaverð kr.2500. Sími 5855790.

Jónatan Grétarsson er ungur ljósmyndari sem leitast við að skrásetja íslenska listamenn og hefur í aðdraganda sýningarinnar tekið fjölda ljósmynda af meira en hundrað listamönnum úr öllum listgreinum og á ýmsum aldri. Á sýningunni verða um 40 portrett af þekktum listamönnum og birta þær áhugaverða sýn á skapandi einstaklinga samtímans. Jónatan lauk sveinsprófi í ljósmyndun frá Iðnskólanum í Reykjavík 2002 og hefur hann einnig stundað nám við International Center of Photography í New York. Hann hefur tekið þátt í samsýningum blaða- og ljósmyndarafélagsins og unnið sem ljósmyndari fyrir tímarit auk þess að reka eigið studio.

Á neðri hæð safnsins verða sýnd ný verk eftir myndlistarkonuna Björgu Þorsteinsdóttur. Hér eru á ferðinni málverk og teikningar þar sem listakonan teflir saman efnum og tækni á nýstárlegan hátt. Hún tekst meðal annars á við shiboritækni á austurlenskan pappír og teikningu á svífandi léttum skúlptúrum og lágmyndum. Björg lauk námi við Handíða- og myndlistaskóla Íslands árið 1964. Hún stundaði síðan nám í grafík, teikningu og málun meðal annars við Staatliche Akademie der bildenden Künste í Stuttgart. Í upphafi ferils síns vakti hún athygli fyrir grafíkverk en hefur í seinni tíð unnið málverk og collageverk þar sem hún gerir tilraunir með efni og aðferðir. Björg hefur á ferli sínum haldið fjölda sýninga bæði hér heima og erlendis.

Bræðurnir Ómar og Óskar Guðjónssynir munu spila létta tónlist meðan á opnuninni stendur.
Opið er í Hafnarborg kl. 11-17 alla daga og fimmtudaga kl. 11-21, lokað á þriðjudögum. Aðgangur ókeypis.

Sími Hafnarborgar er 585 5790